Mga kamag-anak ni Elizabeth Batain, nagsalita na

Napaluha na lang ang pamangkin ni Elizabeth Batain matapos mapanood sa balitang nabitay na ang kanyang tyahin.
 “Nagulat lang po. Mami-miss ko po siya,” sabi ni Jenny Rose, pamangkin ni Elizabeth.
Ang biyenan niyang si Nenita Batain ay nagluksa rin sa nangyari.
“Talagang malungkot sa amin iyan kahit sabihin mong manugang ko lamang siya, malungkot din po kami,” sabi ni Nenita.
Pati ang pinsan niyang si Tina, hanggang ngayon ay hindi matanggap na namatay si Batain dahil sa drug trafficking.
“Hindi naman ho dapat siya talaga mabitay dahil wala naman hong alam iyon eh,” sabi ni Tina.
Naawa rin sa sinapit ni Elizabeth, o si "Tootchie," ang kanyang mga kaibigan at dating katrabaho sa Global Lightning Factory kung saan siya naging light tester ng mga ine-export na bumbilya.
Wala raw ibang ginusto si Elizabeth kundi mapagaan ang buhay ng kanyang mga anak.
“Hindi siya tatagal ng 16 years dito kung hindi mabuti ang ugali niya,” sabi ni Roberto Reyes, dating supervisor ni Elizabeth.
Hinihintay na lang daw nila ang mga abo ni Elizabeth na pinaplanong ilibing sa Cavite o sa probinsya niya sa Quezon. Zyann Ambrosio, Patrol ng Pilipino

Source : http://www.abs-cbnnews.com/video/global-filipino/03/30/11/relatives-elizabeth-batain-break-silence

Watch the Video : 
http://www.abs-cbnnews.com/video/global-filipino/03/30/11/relatives-elizabeth-batain-break-silence#ooid=00MHBjMjp9XaY9XLOHGVuGqWShXEofS3